Mill-preżentazzjoni tad-Dikjarazzjoni ta’ Schuman fid-9 ta’ Mejju 1950 ’l hawn, l-Unjoni Ewropea kibret biex saret simbolu ta’ saħħa u għaqda. Biex niċċelebraw dak kollu li ksibna f’dan iż-żmien, f’dan il-“Jum l-Ewropa”, il-Kummissjoni stiednet lill-pubbliku ġenerali biex iżur u jgawdi minn jum ta’ attivitajiet, tagħlim u divertiment għall-familja fil-qalba ta’ Brussell.
Il-Berlaymont – wieħed mill-aktar binjiet ikoniċi tal-Kummissjoni – fetaħ għall-pubbliku s-Sibt 4 ta’ Mejju mill-10:00 sas-18:00.
- X’sabu l-viżitaturi?
Fil-Berlaymont, il-pubbliku kien mistieden jesplora “villaġġi” differenti, l-istorja tal-UE, il-valuri tagħna, u l-kisbiet tal-Kummissjoni Ewropea. Però dan kien biss il-bidu, peress li l-Jum għall-Pubbliku kien ukoll opportunità biex jara xi jkun għaddej wara l-kwinti u kif flimkien qed nibnu UE b’saħħitha, diversa, demokratika u diġitali li tappoġġja lill-poplu tagħha, u li hi impenjata li tibni futur aktar ekoloġiku u ekonomija reżiljenti.
Kien hemm ħafna logħob u attivitajiet għall-etajiet kollha, prestazzjonijiet artistiċi u ikel differenti, kif ukoll opportunitajiet biex wieħed jiltaqa’ mal-membri tat-tim tagħna. Il-viżitaturi kienu mistiedna wkoll jagħtu titwila fil-kamra tal-laqgħat fit-13-il sular fejn il-President von der Leyen u l-Kulleġġ tal-Kummissarji jieħdu deċiżjonijiet għall-benefiċċju taċ-ċittadini. Minn hemm, setgħu jammiraw veduta mill-isbaħ tal-belt.
Iċ-ċittadini tal-UE li kienu qed iħejju biex jivvutaw fl-elezzjonijiet Ewropej li ġejjin, sabu informazzjoni biex tgħinhom jagħmlu l-aħjar użu mill-vot tagħhom.
Xi viżitaturi ddedikaw ftit ħin biex iżuru ċ-ċentru tal-wirjiet Experience Europe. Il-wirja immersiva, adatta għall-familja kollha tibqa’ miftuħa s-sena kollha u hija bla ħlas. Din titfa’ dawl fuq l-istorja u l-valuri li sawru l-passat u l-preżent tal-UE, u jkomplu jsawru l-futur tagħha.
- Informazzjoni prattika
Ħinijiet tal-ftuħ: 10:00–18:00 (l-aħħar dħul fil-17:30)
Ċerimonja Uffiċjali tal-Inawgurazzjoni: 10:00–10:30
Divertiment (fuq barra): 10:30–18:30
Indirizz:
Berlaymont
Rue de la Loi 200
1000 - Bruxelles / BrusselIkklikkja hawn għad-direzzjonijiet
*Jekk jogħġbok innota li f’dan l-avveniment se jittieħdu ritratti u videos. Ir-ritratti u l-videos jistgħu jintużaw għal attivitajiet ta’ komunikazzjoni b’rabta mal-Jum għall-Pubbliku tal-UE. Għal aktar informazzjoni ara l-Istqarrija ta’ Privatezza.
* Il-parteċipanti għandhom ikunu konxji li ċerti oġġetti huma strettament ipprojbiti fil-binjiet u l-uffiċċji tal-Kummissjoni Ewropea. Biex jiġi żgurat Jum l-Ewropa sikur u pjaċevoli għal kulħadd, jekk jogħġbok imxi mal-linji gwida tas-sigurtà rilevanti kollha u ħu nota tal-lista ta’ oġġetti pprojbiti.
Skopri l-attivitajiet tagħna
Skopri 70 sena ta’ storja tal-UE u skopri kif it-tagħlimiet mill-passat qed isawru l-futur tagħna. Tgħallem dwar id-drittijiet u l-opportunitajiet li tkun ċittadin tal-UE, skopri kif l-UE tgħin tipproteġi lin-nies, u kif il-vuċi tiegħek tista’ tagħmel differenza.
Agħti ħarsa wara l-kwinti u ara kif il-Kummissjoni qed tpoġġi l-prijoritajiet fil-prattika. Filwaqt li tieħu s-saħħa mid-diversità, esplora kif l-UE taħdem b’24 lingwa, u tgħallem dwar l-għodod u s-servizzi li jiżguraw li l-UE taħdem GĦALIK.
It-teknoloġija diġitali qed tbiddel il-mod kif in-nies jgħixu, jaħdmu u jagħmlu n-negozju. Idħol f’dan id-“Deċennju Diġitali” il-ġdid u aqra dwar kif l-UE tappoġġja innovazzjonijiet mill-aktar avvanzati, iżżomm id-dinja online tagħna sikura, u tgħin lin-nies u lin-negozji jibnu l-ħiliet ta’ għada.
L-għan tal-Patt Ekoloġiku tal-UE huwa li l-Ewropa ssir l-ewwel kontinent newtrali għall-klima fid-dinja. Esplora kif l-UE qed tgħin tipproteġi l-pjaneta u s-saħħa tagħna, tnaddaf l-enerġija tagħna, tibni sistemi tal-ikel sostenibbli, u tħeġġeġ lin-nies u lin-negozji jimxu lejn futur aktar nadif u aktar ekoloġiku.
Iċ-ċittadini u n-negozji tagħna jistgħu jirnexxu biss jekk l-ekonomija taħdem għalihom. Aħna u niċċelebraw 25 sena tal-Euro u 30 sena tas-Suq Uniku, skopri kif l-UE qed tibni ekonomija b’saħħitha, stabbli u li qed tikber li tiżgura l-ġustizzja u l-prosperità, u tgħin lin-nies u lin-negozji jisfruttaw il-potenzjal tagħhom.
Din hija l-opportunità tiegħek li tħares barra mill-UE u tikkunsidra postha fid-dinja. Skopri kif nissalvagwardjaw il-fruntieri tagħna, nipproteġu l-benesseri taċ-ċittadini tal-UE, u naqsmu l-valuri, l-assistenza u l-opportunitajiet li jsaħħu l-pożizzjoni tagħna bħala attur globali responsabbli.
Matul dawn l-aħħar sentejn, l-UE pprovdiet għajnuna umanitarja, finanzjarja u militari mingħajr preċedent lill-Ukrajna. Nistednuk titgħallem aktar dwar ir-rispons tagħna u kif l-UE qed tindirizza l-impatt tal-gwerra madwar id-dinja, tibni t-tħejjija għad-difiża u tappoġġja rispons ġust għall-kriminalità transfruntiera.
Il-“Kulleġġ tal-Kummissarji” jifforma korp ta’ tmexxija politika b’mandat għal perjodu ta’ 5 snin. Hu jiltaqa’ kull ġimgħa fit-13-il sular tal-Berlaymont. Din hija l-opportunità tiegħek li żżur il-kamra tal-laqgħat tagħhom!
Idħol fl-istudios televiżivi tagħna fejn tista’ tittestja l-iskrin aħdar tagħna u tieħu ritratt ta’ tifkira. Tista’ wkoll tiċċekkja l-faċilitajiet ta’ trażmissjoni bis-satellita tagħna u żżur mużew awdjoviżiv żgħir.
Il-programm ta’ divertiment tagħna għen biex dan il-jum indimentikabbli. Il-viżitaturi ġew mistiedna:
- jesploraw il-wirja tagħna li turi 30 sena ta’ Suq Uniku;
- iduqu wħud mill-aqwa prodotti agrikoli Ewropej tagħna;
- japprezzaw il-prestazzjonijiet artistiċi;
- jiskopru l-UE fil-Belġju.
Gallerija tal-media
EU Open Days 2024 at the European InstitutionsEU Open Days 2024 at the European Institutions 
Open Doors Day at the European Institutions 2024Visitors attending a presentation during the Open Doors Day 
Open Doors Day at the European Institutions 2024: opening ceremony Visitors in line to enter the Berlaymont building during the Open Doors Day 
Open Doors Day at the European Institutions 2024Visitors inside the Berlaymont building during the Open Doors Day 
Open Doors Day at the European Institutions 2024Group photo of workers during the Open Doors Day in front a satellite image of the Earth